Қазақстанда көлік бағасы көз ілеспес жылдамдықпен қымбаттап жатыр. Автомобильдер қауымдастығы көлік құнының өсуіне себеп болған бірнеше мәселенің әлі шешімі табылмағанын мәлімдеді, деп хабарлады 31 арнаның Информбюро ақпараттық бағдарламасы.

Шешімін таппаған негізгі үш мәселе:

  • Әлемде автомобильдің электронды басқару жүйесіне қажет микрочип шығаратын бірнеше кәсіпорынның жабылуы.
  • Қазақстанда құрастырылатын көліктердің қосалқы бөлшектері де, жаңа темір тұлпарлар да былтыр наурыздан бері шекарада тұрып қалған. Содан бері тауар тасымалы кем дегенде 2-3 айға кеш жеткізіліп жатыр.
  • Көлік тасымалдайтын контейнерлердің жетіспеушілігі. Контейнерлер өндірісінің қысқаруына оған қажетті болат пен өзге де материалдардың дефициті себеп.

Оқи отырыңыз: Автокөлік пен пәтерді Trade-in арқылы жаңасына ауыстыру қаншалықты қауіпсіз? 

Экономист Бауыржан Исабеков микрочип шығаратын зауыттар тұрмыстық техникадан автомобиль өндірісіне енді ғана қайта бейімделе бастағанын алға тартып, автокөлік қымбатшылығының 2022 жылдың аяғына дейін созылуы мүмкін екенін айтып отыр.

"Қазіргі таңда Ресей, Германия, Оңтүстік Корея сынды ірі автокөлік өндіруші елдердің өзінде қолданыстағы көлік құны 25-27 пайызға қымбаттады. Тек Қазақстан емес, бізбен көршілес елдерде де көлік бағасының өсу тенденциясын айқап отырмыз. Сондықтан отандастарыма айтарым, егер талаптарыңызға сәйкес келетін автокөлік болса, ертеңге қалдырмай, қазір сатып алған жөн", – деді Бауыржан Исабеков.